陳樂遙（2015年本科畢業，現為英國劇場自由工作者）
畢業十年，由香港媒體轉職至英國戲劇，喺張佬上堂學咩已經唔記得晒，但幾位老師嘅教導一直刻骨銘心，係我繼續創作同進步嘅堅穩基石。
「創意不是閉門造車。」（梁麗娟老師，2012）
選修 Grace 嘅課堂，正正係我初出茅廬嘅 Year 1 第一學期，剛開始寫文章做創作，對自己毫無信心，好怕出醜，怕自己嘅作品唔入流，每一次醜婦見家翁前都好緊張，唔敢拎自己作品出嚟見人。Grace 提醒我哋呢一句，所有創意都係「X出嚟」，又分享業界例子，指各大報章每一朝都會開過題大會，討論大家嘅題目，再資深嘅記者，都一定試過題目被彈返轉頭，故仔被大改。但每一次唔成功嘅經驗都係學習機會，過題率必定可以慢慢上升。於是而家即使改變咗創作嘅媒介，每次拎新作品出嚟、聽評語前有幾緊張，我都會再提醒自己，每一份創意都百 X成材，失敗同批評就係創作嘅養分。
「用畫面講故事。」（潘達培老師，2013）
後來做影像創作，好中意喺畫面上寫字，覺得咁先能夠清楚表達意思，矯情不特止，仲突顯自己唔識善用視覺語言嘅缺點。喺業界多年經驗嘅培哥，喺「用畫面講故事」嘅高手，喺課堂上同Anthony 一齊，用唔同嘅作品提醒我哋，好嘅故事唔使講晒出嚟。而家做舞台戲劇創作，我亦經常用呢句說話提醒自己，戲劇唔係廣播劇實體化，除咗對白外，仲有舞台空間、調度、美學，各方面配合講故事，先係好好善用緊舞台呢個媒介，亦令舞台作品獨一無二。
「Pop Culture 都係吹出嚟㗎咋！」（周佩霞老師，2014）
我唔係想笑流行文化研究係吹水！而係本來流行文化同社會科學，就係更深入地去分析生活每個細節，霞姐嘅戲言，令我喺創作上都會思考更多背後嘅社會脈絡。我嘅戲劇碩士畢業作品講述我喺歐洲被白人男人搭訕嘅經歷，背後代表嘅係種族同性別嘅權力，概念都係由霞姐係課堂上帶我認識，學習用更深層次嘅視角去審視社會，亦讓我可以將呢啲元素融入創作，帶嚟更有睇法嘅戲劇作品。
十年過去，從香港新聞室到英國劇場，一路走來嘅每步創作，我都受益於呢幾位老師嘅教導。同時，我嘅戲劇構作老師馮程程都係新傳師姐，繼續帶領新一代創作人承傳呢種視覺，由個人出發去觀察社會，並學習用每個不用媒介一齊去講好一個故事。好嘅作品能夠跨越語言同地域限制，成為不同社會之間了解嘅工具。呢段新傳嘅旅程，令我一步步喺英國用我嘅創作，成為連接不同文化嘅橋樑。而這份信念同幾位老師嘅教誨，亦會持續引領我前行。
Follow
